20080917 mostra de teatro Daniel Cortezón

A CONCELLEIRA DE CULTURA CONSIDERA QUE A MOSTRA DE TEATRO AFECCIONADO DANIEL CORTEZÓN XA ESTÁ CONSOLIDADA EN RIBADEO.
Ribadeo, 17 de setembro de 2008. A concelleira de Cultura, Mariluz Álvarez Lastra, convida a todos os veciños de Ribadeo a que se acheguen desde mañá e ata o domingo ao Auditorio Municipal Hernán Naval para presenciar algunha das obras que forman o programa da V Mostra de Teatro Afeccionado Daniel Cortezón. Álvarez Lastra anima "á xente a que acuda a ver estas compañías de teatro afeccionado xa que é unha maneira de potencialas, de poñelas en valor e ademáis é unha ocasión para que poidan actuar nos escenarios e ao mesmo nivel que as compañías profesionais".
A edil nacionalista considera que "esta quinta edición amosa que a mostra está consolidada e que cada vez ten máis peso tanto de asistencia coma das compañías que veñen ao noso concello a participar nesta cita".
A Mostra de Teatro Daniel Cortezón arranca mañá xoves 18 de setembro ás oito e media da tarde en Ribadeo coa actuación da Aula Municipal de Teatro de Ribadeo que porá en escea a obra Casa sen ventás.
A entrada a todas as obras de teatro é gratuita.